Қирғизистонда “хорижий агентлар” тўғрисидаги қонун қабул қилинди

Қирғизистон парламенти депутатлари расман “Нотижорат ташкилотлари тўғрисида”ги қонунга ўзгартишлар киритиш тўғрисида”ги қонун лойиҳаси сифатида маълум бўлган “хорижий агентлар” тўғрисидаги қонун лойиҳасини қабул қилди, деб ёзади “24.kg”.

Ҳужжатга 66 депутат овоз берган, 5 нафари қарши чиққан. Қонун лойиҳаси имзолаш учун Қирғизистон президентига юборилган.

Маҳаллий матбуотнинг ёзишича, агар қонун қабул қилинса, Қирғизистондаги “хорижий агентлар” “хорижий вакиллар” деб номланади. Улар Россиядаги “хорижий агентлар” рўйхатига дастлаб киритилган хорижий молиялаштириш ва сиёсий фаолият мезонлари бўйича тегишли реестрга киритилади. Улар учун режали (йилига бир мартадан кўп бўлмаган) ва режадан ташқари текширишлар ўрнатилади.

Шунингдек, қонун лойиҳасида “хорижий агентлар” ўз фаолияти тўғрисида, жумладан, хорижий манбалардан олинган маблағлар ва улардан фойдаланиш аудити, бошқарув, ходимлар сони ва уларнинг иш ҳақи тўғрисидаги маълумотларни мунтазам равишда батафсил ҳисобот тақдим этишлари шарт. Бундан ташқари, ҳар олти ойда бир марта оммавий ахборот воситаларида ўз фаолияти тўғрисида ҳисобот эълон қилишлари керак.