Россия деярли барча иссиқлик электр станцияларини (ИЭС) йўқ қилди, атом электр станцияларига ҳужумлар истисно қилинмайди – Зеленский

Президент Владимир Зеленский россияликлар Украина атом электр станциялари инфратузилмасига ҳужум қилиши мумкинлигини истисно этмаяпти ва шу муносабат билан Украинани замонавий ҳаво ҳужумидан мудофаа тизимлари билан таъминлашни сўрамоқда. Бу ҳақда давлат раҳбари Европа кенгаши йиғилишидаги онлайн нутқида маълум қилди, дея хабар бермоқда “Интерфакс-Украина”.

“Россия бизнинг деярли барча ИЭСмизни йўқ қилди. Тўғон ва гидроэлектр станциялар, шунингдек, газ инфратузилмаси террористик ҳужумларга учрамоқда. Россия радиациявий шантаждан воз кечмаяпти ва хусусан, Запороже атом электр станцияси хавфсизлиги билан шафқатсизларча ўйнашда давом этмоқда. Бошқа атом электр станцияларимиз ва тарқатиш тармоқларимиз инфратузилмаси ҳам Россия террори таҳдиди остида эканлигини истисно қилмаймиз”, — деди у.

Зеленский яна бир бор ҳаво мудофаа тизимларини Украинага ўтказиш зарурлигини таъкидлади.

“Буни фақат ҳаво мудофааси – Патриот, Ирис-Т, Самп-Т, Насамс каби махсус тизимлар тўхтатиши мумкин. Сизда тизимлар бор. Улар Украинага ҳозир керак – улар Путиннинг террорчилик усулларидан фойдаланишининг олдини олиш учун керак”, — деган президент.

У “Россия армияси ўз кучини қуролли таркибга тегишли деярли ҳамма нарсада ҳис қилади”, – деб тан олди. Айнан мана шу куч – артиллерия, техника, осмонда ҳаракат қилиш қобилияти туфайли улар бизга босим ўтказмоқда ва аста-секин ҳаракат қилмоқда. Путин энди контрҳужумда муваффақият қозонишига умид қилмоқда ва бу умиднинг бирдан-бир илдизи аскарларимизда қурол-яроғ етишмаслигидадир”.