Грузия Бош вазири Ўзбекистонга ташриф буюрди

Душанба куни Грузия Бош вазири Ираклий Гарибашвили бошчилигидаги ҳукумат делегацияси расмий ташриф билан Тошкентга келди. Аэропортда уни Ўзбекистон Бош вазири Абдулла Арипов, инвестициялар ва ташқи савдо вазири ўринбосари Жамшид Хўжаев ва бошқа расмий шахслар кутиб олди. Бу ҳақда Инвестициялар ва ташқи савдо вазирлигига таяниб, “Газета” нашри ёзади.

Грузия ҳукумати матбуот хизматининг хабар беришича, Ираклий Гарибашвили юқори мартабали расмий шахслар билан бир қатор музокаралар олиб боради.

Грузия ҳукумати раҳбари етиб келиши биланоқ “Янги Ўзбекистон” истироҳат боғига ташриф буюриб, Мустақиллик монументи пойига гул қўйди. Кейин бугунги кунда собиқ “ТАПОиЧ” авиация заводи ўрнидаги 17 та ишлаб чиқариш объекти жойлашган “Технопарк” билан танишди.

Ўзбекистон ва Грузия ўртасида эркин савдо режими амал қилади. Ўзбекистон Грузияга асосан саноат товарлари, кимё маҳсулотлари, ичимликлар, автомобиллар ва транспорт ускуналарини етказиб беради. Грузия Ўзбекистондан фармацевтика маҳсулотлари, транспорт ускуналари, озиқ-овқат маҳсулотлари ва бошқа маҳсулотлар импорт қилади. Ўзбекистон ҳудудида Грузия капитали иштирокидаги 69 та корхона фаолият юритмоқда. Грузияда Ўзбекистон сармояси иштирокида 23 та корхона фаолият юритмоқда.

2017 йилдан буён мамлакатлар ўртасидаги товар айирбошлаш ҳажми 34,3 фоизга ўсиб, 127,4 миллион долларни ташкил этди. Томонлар ушбу кўрсаткични салоҳиятга мос келмайдиган деб ҳисоблашади ва уни сезиларли даражада ошириш ниятида.

ИТСВ хабарида айтилишича, Грузия Бош вазири Ўзбекистоннинг улкан сармоявий ва саноат салоҳиятига эътибор қаратган.