Авдеевка яқинида илк бор Американинг Abrams танклари кузатилди

Россия ҳарбийлари илк бор Авдеевкадаги фронт чизиғи яқинида Американинг Abrams танкларини кузатишди,  бу ҳақда “ДНР” раҳбарининг маслаҳатчиси Игорь Кимаковский ТАСС агентлигига билдирган. “Йўналиш – Авдеевкадан шимоли-ғарбда”, – дея аниқлик киритган у.

Кимаковскийнинг қўшимча қилишича, Авдеевка йўналишида Украина армияси дронлардан фойдаланишни оширмоқда.

АҚШ 2023 йил январь ойида 31 M1 Abrams танкларини етказиб беришини эълон қилганди. Украина ўзининг биринчи танкларини сентябрь ойининг охирида олди. Жорий йилнинг февраль ойида Американинг Forbes нашри Авдеевка учун жанглар пайтида Украина Қуролли Кучлари Abrams базасидаги битта зирҳли мина тозалаш машинаси – M1150 Assault Breacher ни йўқотгани ҳақида хабар берди. Нашр маълумотларига кўра, 2023 йил охирида Қўшма Штатлар камида битта шундай машинани Киевга яширинча берган, бу расман эълон қилинмаган.